Inter oo hanatay horyaalka Talyaaniga markii 21-aad

Milaan (Dawan) – Kooxda Inter Milan ayaa si rasmi ah ugu guuleysatay horyaalka Talyaaniga ee Serie A markii 21-aad taariikhdeeda, kadib markii ay 2-0 kaga adkaatay kooxda Parma kulanka 35-aad ee horyaalka.

Labada gool ee kulanka waxaa u kala dhaliyay Marcus Thuram oo shabaqa soo taabtay dhammaadka qeybta hore, iyo Henrikh Mkhitaryan oo dhaliyay goolka labaad daqiiqaddii 80-aad.

Guushan ayaa sare u qaadday dhibcaha Inter ay ku hogaamineyso horyaalka oo gaaaraya 82 dhibcood, iyadoo 12 dhibcood ka horeysa kooxda Napoli oo ku jirta kaalinta labaad, halka ay 13 dhibcood ka sarreyso kooxda ay xafiiltamaan ee AC Milan.

Inter waxay dib ugu soo ceshatay horyaalkii ay Napoli sida dirqiga ah uga guuleysatay sanadkii hore.

Inter waxay sidoo kale laba horyaal ka sara martay Milan marka la eego tirada koobabka horyaalka, maadaama Milan ay ku guuleysatay 19 jeer, markii ugu dambeysayna ahayd xilli ciyaareedkii 2021–2022.

Tababaraha u dhashay Romania, Cristian Chivu ayaa kula guuleystay Inter koobkiisii ugu horreeyay tan iyo markii uu xilka la wareegay bilowga xilli ciyaareedkan, kadib markii uu beddelay Simone Inzaghi.

Inter waxaa weli horyaalka uga harsan saddex kulan , iyadoo sidoo kale isu diyaarineysa final-ka Koobka Talyaaniga, si ay ugu guuleysato labada koob ee ugu muhiimsan Talyaaniga.