Muqdisho – Dhaqdhaqaaqyo siyaasadeed oo isdaba-joog ah oo uu waday Guddoomiyihii hore ee Gobolka Banaadir, Yuusuf Xuseen Jimcaale “Madaale”, maalmihii lasoo dhaafay ayaa mar kale dhaliyay su’aalo ku saabsan jihada uu u weecinayo mustaqbalkiisa siyaasadeed, iyo in uu doonayo in uu dib ugu soo laabto kursiga Duqa Muqdisho, isaga oo aan ka tirsanayn xisbigii lagu baraty ee uu siyaasadda kasoo galay, xilli muuqaalka siyaasadda caasimaddu uu marayo marxalad xasaasi ah.
Madaale, oo bishii hore si cad uga horyimid go’aanka Ururka Caddaaladda iyo Wadajirka (JSP) ee Xasan Maxamed Xuseen “Muungaab”, loogu doortay musharraxnimada Gobolka Banaadir ayaa ku tilmaamay tallaabadaas mid aan ku dhisnayn sharciyadda iyo xeerarka ururka. Hadalkaas wuxuu muujiyay kala fogaanshaha sii xoogeysanaya ee u dhexeeya isaga iyo hoggaanka sare ee ururka uu ilaa iyo hadda ugu magacaabanyahay Xoghayaha Horumarinta.
Madaale oo aan looga baramin hadallada kulul ee siyaasadda ayaa yiri” “Waa nasiib darro in ku-xigeenka xoghayaha guud uu meel olole ah kaga dhawaaqo musharrax aan la isla ogayn. Arrintaas waa mid aan loo dhamayn,” .
Markii uu Cabashadiisa uu waayay xaal-marin, ayuu wax ka yar bil kadib, bilaabay inuu ka soo muuqdo fagaarayaal siyaasadeed oo ka baxsan xayndaabka ururkiisa. 4-tii December 2025, wuxuu ka qeyb galay kulan ay yeesheen Guddoomiyihii hore ee Gobolka Banaadir Maxamed Axmed Amiir iyo Madaxweynihii hore ee Soomaaliya Shariif Sheekh Axmed, kuwaas oo ah wajiyo ku suntan safka mucaaradka.
Qoraal kooban oo laga soo saaray kulankaas ayaa lagu sheegay in laga wada-hadlay xaaladda guud ee dalka, gaar ahaan tan caasimadda, iyo baahida loo qabo doorasho lagu wada yahay heshiis. Waxa ay ahayd farriin dadban oo dhaliilaysa jihada siyaasadeed ee dowladda hadda jirta iyo qorshaha doorashada ee xisbul-xaakimka.
Intaas kuma joogsan ee toban maalin kaddib Madaale ayaa ku booqday Ra’iisul Wasaarihii hore Xasan Cali Khayre gurigiisa, isaga oo kala hadlay arrimo la xiriira deganaanshaha dalka iyo iskaashi siyaasadeed. Kulamadan is xigxigay ee aan looga baranin Duqii hore ee caasimadda ayaa sii xoojinaya aragtida ah in Madaale uu iska dhiibay golayaaasha mucaaradka.
Madaale ayaa xilka Guddoomiyaha Gobolka Banaadir laga qaaday 10-kii December 2024, balse weli si rasmi ah ugama bixin Ururka JSP, inkasta oo khilaafka jira iyo dhaqdhaqaaqyada uu wado ay muujinayaan kala fogaansho siyaasadeed oo sii qoto dheeraanaya.
