Mogadishu (Dawan) – Wasaaradda Waxbarashada, Hiddaha iyo Tacliinta Sare ee Soomaaliya ayaa si rasmi ah u shaacisay magacaabista Guddiga Dib-u-eegista Manhajka Qaranka, kaas oo ka kooban 15 xubnood oo khibrad sare u leh dhinaca waxbarashada.
Guddigan ayaa loo xilsaaray dib-u-eegista manhajka waxbarashada ee fasallada 1–12-aad, si loo hubiyo in manhajku u adeegayo baahiyaha bulshada Soomaaliyeed isla markaana la jaanqaadayo horumarka mustaqbalka.
Maxay tahay ujeeddada guddigan?
Guddigan ayaa mas’uul ka noqon doona dib-u-eegista iyo horumarinta manhajka waxbarashada dalka, iyagoo ka shaqeyn doona sidii manhajka cusub uu ula jaanqaadi lahaa heerarka caalamiga ah, isla markaana uu uga tarjumi lahaa dhaqanka iyo baahiyaha bulshada Soomaaliyeed.
Sidoo kale, guddiga waxaa laga sugayaa inay kor u qaadaan tayada waxbarashada dalka, islamarkaana ay xaqiijiyaan in manhajku noqdo mid casri ah oo ku habboon baahiyaha ardayda Soomaaliyeed ee maanta iyo mustaqbalka.
Xubnaha guddiga iyo khibradahooda
Maxamed Cabdulqaadir Nuur (Guddoomiye) – In ka badan 30 sano oo khibrad ah (1984–2026), isagoo ka soo shaqeeyay qaybaha kala duwan ee waxbarashada sida macallin, xubin iyo hoggaan.
Dr. Cabdullaahi Axmed Bariise (Guddoomiye ku xigeen) – Ku dhow 30 sano oo khibrad ah, gaar ahaan horumarinta manhajka iyo cilmi-baarista waxbarashada.
Dr. Cali Cabdullaahi Warsame (Xubin) – In ka badan 25 sano oo khibrad ah, isagoo ka shaqeeyay waxbarashada iyo horumarinta manhajka.
Dr. Cabdulqaadir Sheekh Maxamed (Xubin) – Ku dhow 25 sano oo khibrad ah, gaar ahaan qiimeynta waxbarashada.
Raaqiya Axmed Maxamed (Xubin) – In ka badan 20 sano oo khibrad ah oo ku saabsan maamulka waxbarashada iyo horumarinta manhajka.