Soomaaliya waxay mar kale dhex-istaagtay marxalad halis ah

Mar la hoogoo la ba'ay oo 21 sano oo xukun militari ah iyo 10 sano oo dowlad la'aan ah dabadood, Soomaalidii iskugu timid Carta waxay ku heshiiyeen in xukunka hab nabad ah lagula kala wareego muddo-xileedka qolo kasta marka uu dhamaado. Yaanba sidii la rabay loo fulin laakiin lix madaxweyne ayaa isku-baddashay heshiiskaas ka soo billowday Carta. Farrrintu waa cadayd, waxayna ahayd "xukun-kaligii-talis ah ma oggolin, maroorsina warkii daa.

Beriga oo ay taariikhdu tahay April 14, 2026 waxaa dhamaaday muddo-xileedkii baarlamaanka. Muddo xileedka Madaxweynahana waxaa ka heray hal bil oo kaliya. Wax heshiis siyaasadeed ah lama hayo. Madaxweyne Xassan Sheekh asagoo adeegsanaya xeerkiisa iyo guddigiisa iyo computer-kiisa Villada u yaal ayuu rabaa inuu xukunka si sharci-darro ah ku maroorsado. Doorasho been ah iyo taageeerada dadka Soomaaliyeed ay siiyaan dalalka caalamka xalaal kama dhigayaan xukun-boob.

Madaxweyne: Dadka ha sii kala fogeyn oo yaan dartaa xukun loogu diririn. Kor dad waa wada indho. Ku soo noqo dastuurkii aad madax ku noqotay, mucaaradkana kala heshii sidii doorashooyin dadban oo ka fiican kuwi hore loo aadi lahaa. Ha laga daayo cabburinta iyo xarigga muwaadiniinta si nabad ah fikirkooda u cabbiraya.

Mucaaradka: Nidaamka ayaa ku kale laga agdhisayaa sax maha. Weli fursad baa jirta ee si nabad ah oo miyir ah ku raadiya is-baddalka.

Dadweynaha: Dhammaanteen masuuliyad baa naga saaran inaan si nabad ah uga hor nimaad ciddii rabta inay boobto xukunka, magaca ay doontaba boobkaas ha u bixisee. "Haddaan Maahsanaa, miyir-doorsanaa, Miiraabay oo, mugga waan ilbaxay" ayuu Gaarriye yiri. Hadde muggaan kurteen waa ilbaxnay oo siyaasiyiin nama siri karaan.

Caalamka iyo Dalalka Soomaaliya Saaxiibka la ah: Taageera in si nidaam ah oo heshiis lagu yahay awoodda lagula kala wareego.

Fiiro Gaar ah: Qormadani waxay ka tarjumeysaa ra’yiga qoraha, ma matalayso mowqifka DAWAN